ବୋତଲରେ ଦେଲେ ନାହିଁ ପେଟ୍ରୋଲ, ଗାଡ଼ି ଟାଙ୍କି ନେଇଆସିଲେ ସାଇକେଲରେ
ଅନେକ ସମୟରେ ଯଦି ବାଇକ୍ କିମ୍ବା ଗାଡ଼ିରୁ ତେଲ ସରିଯାଏ, ତେବେ ଆପଣ ହୁଏତ କୌଣସି ଏକ ବୋତଲ କିମ୍ବା ଡବାରେ ପେଟ୍ରୋଲ କିମ୍ବା ଡିଜେଲ ଆଣି ଗାଡ଼ିରେ ପକାଇଥାନ୍ତି । କିନ୍ତୁ ବେଳେବେଳେ ଏଭଳି କିଛି ପେଟ୍ରୋଲ ପମ୍ପରେ ଦେଖିଥିବେ ଯେଉଁଠାରେ କର୍ମଚାରୀ ବୋତଲରେ ତେଲ ଦେବାକୁ ମନା କରିଥାନ୍ତି ।
ତେବେ ଏହିଭଳି ଏକ ଭିଡିଓ ଭାଇରାଲ ହେଉଛି, ଯେଉଁଠାରେ ପେଟ୍ରୋଲ ପମ୍ପ ବୋତଲରେ ତେଲ ନଦେବାରୁ ଯୁବକ ସିଧା ସାଇକେଲରେ ବାଇକ୍ ଟାଙ୍କିକୁ ବାନ୍ଧି ପେଟ୍ରୋଲ ପମ୍ପରେ ପହଞ୍ଚିଯାଇଥିଲେ, ଯାହାପରେ ସେଲ୍ସମ୍ୟାନ୍ ସାଇକେଲରେ ବନ୍ଧା ହୋଇଥିବା ଟାଙ୍କିରେ ପେଟ୍ରୋଲେ ଭରିଥିଲେ । ଏହି ସମୟରେ କେହି ଏହାର ଭିଡିଓ ସୁଟ୍ କରିଥିଲେ । ଏହି ଭିଡିଓ ଏବେ ଭାଇରାଲ ହେଉଛି । କୁହାଯାଉଛି ଭିଡିଓଟି ଉତ୍ତରପ୍ରଦେଶ ପୀଲୀଭୀତ ପୂରନପୁରର ବୋଲି ।
ପୂରନପୁର ସ୍ଥାନୀୟ ପେଟ୍ରୋଲ ପମ୍ପରେ ବୋତଲ କିମ୍ବା ଡବାରେ ପେଟ୍ରୋଲ ମିଳେନାହିଁ, ତେଣୁ ଯୁବକ ଜଣକ ଏକ ଭିନ୍ନ ଉପାୟ କରିଥିଲେ ଏବଂ ସିଧା ବାଇକର ଟାଙ୍କିହିଁ ଖୋଲି ପେଟ୍ରୋଲ ଭରିବା ପାଇଁ ପମ୍ପକୁ ନେଇଆସିଥିଲେ । ତାହା ପୁଣି ସାଇକେଲ ପଛରେ ଲଦି । ଯାହାର ଭିଡିଓ ଏବେ ଭାଇରାଲ ହେବାରେ ଲାଗିଛି ।