ଆଉ କେତେ ଟଙ୍କା ଲୁଚାଇଛି କୁବେର ଯନ୍ତ୍ରୀ ? ସ୍ତ୍ରୀ, ଶାଳୀ ଓ ପୁତୁରାକୁ ଚାଲିଛି ଭିଜିଲାନ୍ସ ଜେରା
ଭୁବନେଶ୍ୱର(ଓଡ଼ିଶା ଭାସ୍କର): କୁବେର ଯନ୍ତ୍ରୀ କାର୍ତ୍ତିକେଶ୍ୱର ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ଆସିଛି ବଡ଼ ଖବର । ଭିଜିଲାନ୍ସ ଅଫିସରେ ୩ ଜଣଙ୍କୁ ଅଟକ ରଖି ଜେରା ଚାଲିଛି । କାର୍ତ୍ତିକେଶ୍ୱରଙ୍କ ଦ୍ୱିତୀୟ ପତ୍ନୀ, ଶାଳୀ ଓ ପୁତୁରାଙ୍କୁ ଅଟକ ରଖି ଜେରା ଚାଲିଥିବା ସୂଚନା ମିଳିଛି । କାର୍ତ୍ତିକେଶ୍ୱରଙ୍କ ସହ ୩ ଜଣଙ୍କୁ ମୁହାଁମୁହିିଁ ଜେରା କରୁଛି ଭିଜିଲାନ୍ସ । କାର୍ତ୍ତିକେଶ୍ୱରଙ୍କ ଟଙ୍କା କାରବାରରେ ପୁତୁରାର ଭୂମିକା ଥିବା ସୂଚନା ମିଳିଛି । ଆମେ କିଛି ଜାଣିନୁ ବୋଲି କାର୍ତ୍ତିକେଶ୍ୱରଙ୍କ ପତ୍ନୀ ଓ ଶାଳୀ ଗଣମାଧ୍ୟମ ଆଗରେ ପ୍ରତିକ୍ରିୟା ପ୍ରକାଶ କରିଛନ୍ତି ।
ତେବେ ଗିରଫ ହୋଇଥିବା କୁବେର ଯନ୍ତ୍ରୀ କାର୍ତ୍ତିକେଶ୍ୱର ରାଉଳଙ୍କର ପୁଣି ବିପୁଳ ଟଙ୍କା ଠାବ ହୋଇଛି । ନଗଦ ୧ କୋଟି ୪୧ ଲକ୍ଷ ୬୨ ହଜାର ଟଙ୍କା ଠାବ କରିଛି ଭିଜିଲାନ୍ସ । କାର୍ତ୍ତିକେଶ୍ୱରଙ୍କ ଦ୍ୱିତୀୟ ପତ୍ନୀଙ୍କ ଭଉଣୀ ଘରୁ ୧.୪୧ କୋଟି ଟଙ୍କା ଠାବ ହୋଇଥିବା ଜଣାପଡିଛି । ଭୁବନେଶ୍ୱରର ସାଲିଆ ସାହି ଘରୁ ୧.୪୧ କୋଟି ଟଙ୍କା ଠାବ କରିଛି ଭିଜିଲାନ୍ସ । କେବଳ ଟଙ୍କା ନୁହେଁ, ବରଂ ୩୫୪ ଗ୍ରାମ ସୁନା ମଧ୍ୟ ଠାବ ହୋଇଥିବା ସୂଚନା ମିଳିଛି ।
ଭିଜିଲାନ୍ସ ଜେରା ଚାଲିଥିବା ବେଳେ କାର୍ତ୍ତିକେଶ୍ୱରଙ୍କ ଗୁମର ଖୋଲିଛନ୍ତି ଦ୍ୱିତୀୟ ପତ୍ନୀ କଳ୍ପନା ପ୍ରଧାନ । ବର୍ତ୍ତମାନ ସୁଦ୍ଧା ଯନ୍ତ୍ରୀ ନଗଦ ୩ କୋଟି ୪୧ ଲକ୍ଷ ୬୬ ହଜାର ଯଙ୍କା ଜବତ ହୋଇଛି । ପୋଖରୀପୁଟରେ ୩ ମହଲା ଘର କିଣିଛନ୍ତି ଦ୍ୱିତୀୟ ପତ୍ନୀଙ୍କ । ୩ ମହଲା ଘର ବାବଦକୁ ଦେଇଛନ୍ତି ୭୮ଲକ୍ଷ ୫୦ହଜାର ଟଙ୍କା ।
ଅନ୍ୟପଟେ ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ଶେଷରେ ଗିରଫ ହୋଇଛନ୍ତି ସହକାରୀ ନିର୍ବାହୀ ଯନ୍ତ୍ରୀ କାର୍ତ୍ତିକେଶ୍ୱର ରାଉଳ । ଗତକାଲି କାର୍ତ୍ତିକେଶ୍ୱର ରାଉଳଙ୍କୁ ଗିରଫ କରିଛି ଭିଜିଲାନ୍ସ । ଭିଜିଲାନ୍ସ ଚଢ଼ାଉ କରି ପୂର୍ବରୁ ତାଙ୍କ ପାଖରୁ ୨ କୋଟିରୁ ଅଧିକ ଟଙ୍କା ଜବତ କରିଥିଲା । ଭଞ୍ଜନଗର କ୍ଷୁଦ୍ର ଜଳସେଚନ ବିଭାଗର ସହକାରୀ ଯନ୍ତ୍ରୀ କାର୍ତ୍ତିକେଶ୍ୱର ରାଉଳ ଘରୁ ୨ କୋଟି ଟଙ୍କା ନଗଦ ଠାବ କରିଥିଲା ଭିଜିଲାନ୍ସ । କାର୍ତ୍ତିକେଶ୍ୱରଙ୍କ ଭୁବନେଶ୍ୱର ଟାଟା ଆରିଆନା ସ୍ଥିତ ଫ୍ଲାଟରୁ ମିଳିଥିଲା ଟଙ୍କା ଏହି ନଗଦ ଟଙ୍କା । ନଗଦ ୨ କୋଟି ଜବତ କରିବା ଭିଜିଲାନ୍ସ ଇତିହାସରେ ରେକର୍ଡ । ଏପର୍ଯ୍ୟନ୍ତ ତାଙ୍କର ୭ଟି ପ୍ଲଟ, ୨୦ଟି ସୁନା ବିସ୍କୁଟ ସହ ପ୍ରାୟ ୫୮୦ ଗ୍ରାମର ସୁନା ଜବତ ହୋଇଥିଲା ।
