ଘରେ ଏକୁଟିଆ ଥିବା ମାଲିକାଣୀଙ୍କ ତଣ୍ଟି ଚିପି ହତ୍ୟାକଲା ଟ୍ରାକ୍ଟର ଚାଳକ: ୬ ଭାରି ସୁନା, ଟଙ୍କା ନେଇ ଚମ୍ପଟ ମାରିଲା ଅଭିଯୁକ୍ତ
କଣିହାଁ (ଭାସ୍କର ନ୍ୟୁଜ୍): ଚୋରି କରିବା ଉଦେଶ୍ୟ ରଖି ମାଲିକାଣୀଙ୍କୁ ହତ୍ୟା କରିବା ନେଇ କଣିହାଁ ଥାନାରେ ଅଭିଯୋଗ ହୋଇଛି । ଏନେଇ କଣିହାଁ ଥାନାରେ କେସ୍ ନଂ-୨୦୦/୨୧ରେ ଏକ ହତ୍ୟା ମାମଲା ରୁଜୁ କରି ପୁଲିସ୍ ଅନୁସନ୍ଧାନ ଚଳାଇଥିବା ଜଣାପଡିଛି । ଏଭଳି ଅଭାବନୀୟ ଘଟଣାଟି ଘଟିଛି ୨ୟ ଶିଳ୍ପ ସମୃଦ୍ଧି ଅଂଚଳ ବୋଲାଉଥିବା କଣିହାଁ ଥାନା ଇଲାକାରେ କୁମୁଣ୍ଡା ଗ୍ରାମରେ ।
ଅଭିଯୋଗ ମୁତାବକ, କଣିହାଁ ଥାନା କୁମୁଣ୍ଡା ମରଡ ହରିହରପୁର ସାହିରେ ସୋମବାର ବିଳମ୍ବିତ ରାତିରେ ମାଲିକାଣି ଏକୁଟିଆ ରହୁଥିବାର ସୁଯୋଗ ନେଇ ଟ୍ରାକ୍ଟର ଚାଳକ ଜଣକ ମାଲିକାଣୀ ନବାସୀ ସାହୁ(୮୦)କୁ ହତ୍ୟାକରି ଲୁଟ୍ପାଟ୍ କରିଥିବା ଜଣାପଡିଛି । ୭୦ହଜାର ଟଙ୍କା, ସୁନା ୬ଭରି, ହୋଣ୍ଡା ଆକ୍ଟିଭା ସ୍କୁଟି ନେଇ ଅଭିଯୁକ୍ତ ଚାଳକ ଫେରାର୍ ହୋଇଯାଇଥିବା ପୁଲିସ୍ ସୂତ୍ରରୁ ପ୍ରକାଶ । ଅଭିଯୁକ୍ତ ତଥା ଟ୍ରାକ୍ଟର ଚାଳକ ପାଲଳହଡା ଥାନା ଅଂଚଳର ବିକାଶ ଦେହୁରି(୨୮) ବୋଲି ଜଣାପଡିଛି ।
ଘଟଣାରୁ ପ୍ରକାଶ ଯେ, ମୃତକ ମାଲିକାଣୀ ନବାସୀ ସାହୁଙ୍କର ଦୁଇ ପୁଅ ଓ ବୋହୁ । ବଡ ପୁଅ ବୋହୁ ଗାଁ ବାହାରେ ରହୁଥିବା ବେଳେ ସାନପୁଅ ରାତି ଡ୍ୟୁଟିରେ ଯାଇଥିଲେ ଏବଂ ସାନବୋହୁ ତାଙ୍କ ବାପା ଘରକୁ ଯାଇଥିଲେ । ଅଭିଯୁକ୍ତ ଚାଳକ ଜଣଙ୍କ ଲୋଭଗ୍ରସ୍ତ ହୋଇ ଏକୁଟିଆର ସୁଯୋଗ ନେଇ ଏଭଳି ନାରକୀୟ କାଣ୍ଡ ଘଟାଇଥିବା ପୁଲିସ୍ ପ୍ରାଥମିକ ଅନୁସନ୍ଧାନର ଜାଣିବାକୁ ପାଇଛି । ଅଭିଯୁକ୍ତ ବିକାଶ ଗାମୁଛାରେ ନବାସୀଙ୍କ ତଣ୍ଟିଚିପି ହତ୍ୟା କରିବା ପରେ ଘରର ଆଲ୍ମାରୀ ଭାଙ୍ଗି ସୁନା, ଅର୍ଥ ଲୁଟ୍ପାଟ୍ କରି ଫେରାର୍ ହୋଇଯାଇଛି। ଅଭିଯୁକ୍ତ ଧରିବା ପାଇଁ ଛାନ୍ ଭିନ୍ କରୁଛି ପୋଲିସ।
